Солиқ маъмуриятчилигида янги усуллар татбиқ этилмоқда 

Солиқ маъмуриятчилигида янги усуллар татбиқ этилмоқда 


Давлат солиқ қўмитаси Солиқ концепцияси доирасида солиқ маъмуриятчилигининг янги усулларини амалиётга жорий қилмоқда, деб хабар бермоқда Kun.uz мухбири.

Давлат солиқ қўмитаси ҳузуридаги «Янги технологиялар» илмий-ахборот маркази ДУК томонидан ташкил этилган матбуот анжуманида мазкур йўналишда амалга оширилаётган ишлар сарҳисоби маълум қилинди. Хусусан, онлайн назорат-касса машиналари ва электрон ҳисоб варақ-фактураларни амалиётга татбиқ этиш бўйича ўтказилаётган тажриба лойиҳаси ҳақида сўз юритилди.

Маълум қилинишича, жорий йилнинг 1 июлида онлайн назорат-касса машиналари бўйича тажриба лойиҳаси якунига етказилади. Ушбу лойиҳа Ўзбекистон Республикаси Вазирлар Маҳкамасининг 2019 йил 21 февралдаги «Тошкент шаҳрида онлайн назорат-касса машиналарини қўллаш бўйича тажриба лойиҳасини амалга ошириш чора-тадбирлари тўғрисида»ги қарорига асосан жорий этилмоқда.

«Янги технологиялар» илмий-ахборот маркази мутахассисларининг қайд этишича, 2019 йил 22 июнь ҳолатига турли йўналишда фаолият олиб борувчи 175дан ортиқ савдо шохобчаларида ихтиёрийлик асосида фискал модулга эга онлайн НКМлар ўрнатилиб, 80 мингдан ортиқ қабул қилинган харид чекларида жами 37 млрд. сўмдан ортиқ миқдордаги товар айланмаси қайд этилди.

«Онлайн назорат-касса машинасининг афзаллиги шундаки, аввалги касса аппаратидан фарқли ўлароқ, ушбу қурилмалар орқали реал вақт режимида харид чеклари ва тадбиркорлик субъектининг ҳақиқий товар айланмаси ҳақидаги маълумотлар солиқ органларига юборилади.

Эски услубдаги касса аппаратлари бўйича маълумотлар унинг хотирасида йиғилиб борган ва фақатгина жойларга келиб солиқ хизмати органлари томонидан маълумот олингандан сўнггина амалга оширилган савдо ҳақида хабардор бўлинган», — дейилади қўмита ахборотида.

Ҳозирда Ўзбекистон Республикаси Президентининг «Савдо ва хизмат кўрсатиш соҳасини янада эркинлаштириш ҳамда пул тушумлари устидан жамоат назоратини кучайтириш юзасидан қўшимча чора-тадбирлар тўғрисида»ги Фармони лойиҳаси жамоатчилик муҳокамаси учун эълон қилинган. Унда ҳам савдо шохобчалари эгалари, ҳам харидорлар учун имтиёзлар кўзда тутилмоқда.

Хусусан, лойиҳада 2019 йил 31 декабрга қадар ҳар бир касса учун онлайн НКМ харид қилиш, ўрнатиш ва ишга тушириш билан боғлиқ харажатлар тадбиркорлик субъектларининг фойда солиғи, ягона солиқ тўлови ёки қатъий белгиланган солиқ тўлови ҳисобидан, бироқ тўлов муддатида амалда бўлган меҳнатга ҳақ тўлашни энг кам миқдорининг 10 бараваридан ошмаган миқдорда камайтирилиши белгиланган.

Шу билан бирга, кассир-амалиётчи томонидан назорат-касса дафтарини юритиш ҳамда иш куни охирида ҳар бир назорат-касса машинаси бўйича кунлик ҳисоботни чиқариб олиш мажбурияти бекор қилинади.

Харидорлар онлайн НКМ орқали берилган чеклар ҳақиқийлигини мобил қурилмалар ёрдамида QR-кодни аниқлаш дастури орқали текшириб олиш имконияти мавжуд. Бу дастурларни App Store ва Google Playдан бепул юклаб олишлари мумкин.

«Бу орқали истеъмолчиларнинг ҳуқуқлари ҳимоя қилинади. Сифатсиз ёки нуқсонли маҳсулотларни сотиб олган харидор, уни қайтариб бериш имкониятига эга бўлади. Бунда чекнинг қоғоз нусхасини сақлаб юриш талаб этилмайди. Маҳсулотнинг харид қилинганлиги ҳақидаги маълумотлар ДСҚнинг маълумотлар базасида ҳамда харидорнинг мобил телефонида ишончли тарзда сақланади», — дейди илмий-ахборот маркази директори Ҳаётжон Насруллоев.

Маълумот учун, мазкур амалиётни татбиқ этиш мажбурий характерга эга эмас, шунга қарамай, келгуси йилдан барча савдо ва хизмат кўрсатиш пунктлари онлайн назорат-касса машиналари ишлаши мажбурий бўлиши таъкидланмоқда.

loading...

Copyright © 2019. Барча ҳуқуқлар ҳимояланган.