O‘zbekistonda texnik ko‘rikka taqdim etilmagan transport vositalari ro‘yxati tuziladi

Hukumat qarori bilan majburiy texnik ko‘rikka taqdim etilmagan avtotransport vositalari hisobini yuritish, shuningdek, foydalanishga yaroqsiz, utilizatsiyaga topshiriladigan transport vositalarini hisobdan chiqarish tartibi to‘g‘risidagi nizom tasdiqlandi. Bu haqda “Huquqiy axborot” kanali ma’lum qildi.



Foto: Sputnik

Qarorga ko‘ra, 2019-yil 1-iyungacha:

majburiy texnik ko‘rikdan o‘tkaziladigan transport vositalarining yagona elektron bazasi shakllantiriladi;

texnik ko‘rikdan o‘tkazilmagan transport vositalarini boshqarganlik holatlarini “Ma’muriy amaliyot” tizimida avtomatlashtirilgan tarzda qayd etish mexanizmi yaratiladi.

Nizomga muvofiq, Yo‘l harakati xavfsizligi bo‘limlari har yili 10-noyabrgacha texnik ko‘rikka taqdim etilmagan transportlar ro‘yxatini tuzadi.

Texnik ko‘rikka taqdim etilmagan transport egalariga 20-noyabrgacha bildirishnomalar yuboriladi.

Shuningdek, 1-dekabrgacha oxirgi 3 yilda ko‘rikdan o‘tkazilmagan transport vositalarining ro‘yxati tasdiqlanadi hamda mazkur ro‘yxat asosida 31-dekabrgacha transport vositalari inventarizatsiyadan o‘tkaziladi.

Inventarizatsiya bo‘yicha transport egasiga quyidagi xabarnomalardan biri yuboriladi:

majburiy texnik ko‘rikdan o‘tkazish to‘g‘risida;

davlat raqami va ro‘yxatdan o‘tganlik guvohnomasi yo‘qolganda, yangi raqam olish va ro‘yxatdan o‘tish to‘g‘risida;

transport yaroqsiz deb topilganida bir oyda uni ta’mirlab yaroqli holatga keltirib texnik ko‘rikdan o‘tkazish to‘g‘risida. Agar mazkur talab bajarilmasa transport hisobdan chiqariladi va 3 kunda uning egasiga bu haqda xabar beriladi.

loading...

Copyright © 2019. Barcha huquqlar himoyalangan.